Гэтаму калектыву пад сілу выкананне самых розных твораў. Але найбольш прывабна гучаць у яго выкананні песні на матчынай мове. Большую частку з іх напісалі самі ўдзельнікі ансамбля сумесна са сваім кіраўніком.

Тыдзень таму да нас дайшлі прыемныя звесткі – ансамбль “Белыя зоры” узяў найвышэйшы прыз на прадстаўнічым расійскім фестывалі (на здымку).

— Наш ансамбль удзельнічаў у IV Міжнародным фестывалі-конкурсе сцэнічнага мастацтва “Южная звезда”, які праходзіў 27-28 лютага ў Растове-на-Доне. Арганізатарамі конкурсу з’яўляюцца фестывальна-конкурсная арганізацыя “Алімпія”, прадзюсерскі цэнтр “Nonstoprecords” (г.Мінск), а таксама Растоўскі саюз дзіцячых і маладзёжных арганізацый, Маскоўскі гарадскі цэнтр культуры свету дзяржаўнай установы “Маскоўскі Дом нацыянальнасцей”, Камітэт міжрэгіянальных сувязей і нацыянальнай палітыкі г.Масквы. У склад журы ўваходзілі вядучыя прад­стаўнікі культуры і мастацтва, пра­фесіянальныя рэжысёры, вакалісты, харэографы з Масквы, Растова і іншых гарадоў Расіі, — расказаў Сяргей Іва­нісаў.

Па яго словах, усе салісты і калектывы ўдзельнічалі ў наступных намінацыях: патрыятычная песня “Моя Отчизна”, фальклорны накіру­нак “Земля родная”, эстрадны, ака­дэмічны і народны вакал, аўтарская і бардаўская песня, інструментальная музыка, танцавальны накірунак, тэатр моды, накірунак для ўдзельнікаў з абмежаванымі фізічнымі магчымасцямі “Я люблю тебя, жизнь”.

На працягу форума журы праслухала 139 удзельнікаў з абласных гарадоў і пасёлкаў, сярод якіх Азоў, Волгадонск, Старачаркаск і інш.

Па ўмовах конкурсу ўдзельнікі прад­стаўлялі адзін творчы нумар у сваёй намінацыі і ўзроставай катэгорыі. Другі дзень быў прысвечаны майстар-класу па вакалу і харэаграфіі, які праводзілі члены журы фестывалю.

Як ужо паведамлялася вышэй, Беларусь прадстаўляў народны вакальна-эстрадны ансамбль “Белыя зоры” пад кіраўніцтвам Сяргея Іванісава ў дзвюх намінацыях. У першай — “Эстрадны вакал” — нашы землякі (без музычнага суправаджэння) выканалі вядомую песню “Черное море” (муз. А.Фельцмана, сл. М.Матусоўскага) з кінафільма “Матрос з “Каметы”. У другой намінацыі прагучаў аўтарскі твор на музыку Іванісава і словы Тамары Гаеўскай “Карнавал сяброў”.

Па выніках фестывалю беларускі калектыў атрымаў Гран-пры ва ўзро­ставай катэгорыі “Сеньёры” (старэй за 26 год). Журы ўзнагародзіла калектыў памятным медалём і спецыяльным прызам фестывалю. Пераможцам у намінацыі “Эстрадны вакал (маладзёжны)” стаў наш саліст Кірыл Стаін, які за выкананне песні “Лесные пожары” атрымаў Дыплом 1 ступені. Членам журы спадабалася яго экспрэсіўнасць і эмацыянальнасць.

Па словах кіраўніка “Белых зораў”, усяго на конкурс падалі заяўкі каля 30 эстрадных выканаўцаў. Маладыя таленты дэманстравалі свае вакальныя здольнасці, сцэнічную інды­відуальнасць, жанравую разнайстанасць песенных тво­раў (ад папулярнай музыкі да джазавых імправізацый). І тым больш каштоўная перамога нашага спевака ў гэтым спа­борніцтве.

Захаванне і падтрымка традыцыйнай беларускай культуры – перспектыўны накірунак дзейнасці самадзейных калектываў, аб чым сведчаць поспехі маладога калектыву з Лошніцы. Новых перамог вам, сябры, і новых прыхільнікаў творчасці!

Анатоль МАЗГОЎ