Сёння традыцыйна ў шматлікіх краінах свету з выпадку Сусветнага дня паэзіі праходзяць літаратурныя вечары, фэсты, прэзентацыі новых кніг, уручаюцца літаратурныя прэміі і г.д. Дзень паэзіі заклікае садзейнічаць развіццю паэзіі, вяртанню да традыцыі паэтычных чытанняў, выкладанню паэзіі, аднаўленню дыялога паміж паэзіяй і іншымі відамі мастацтва (тэатрам, танцамі, музыкай, жывапісам), а таксама заахвоч­ванню выдавецкай справы і ства­рэнню ў СМІ пазітыўнай выявы паэзіі як сапраўды сучаснага віду мастацтва, адкрытага людзям.

Не стаў выключэннем і правін­цы­яльны Барысаў, праўда, тут свята ямбаў і харэяў прайшло даволі сціпла. У малую залу Палаца куль­туры імя Горкага памкнуліся хай і нешматлікія, затое шчырыя пры­хіль­нікі выразнікаў грамадскіх думак і людскіх спадзяванняў, сапраў­дныя аматары вытанчаных радкоў і ары­гінальных рыфмаў.

Адкрываючы святочнае мерапрыемства — своеасаблівую творчую справаздачу мясцовых паэтаў, намеснік старшыні Барысаўскага раённага літаб'яднання «Натхненне» Валянціна Леві расказала пра сутнасць гэтага свята і стаўленне да яго розных пластоў насельніцтва, пра тое, як адклікаліся на паэтычнае слова вядомыя пісьменнікі, навукоўцы і нават школьнікі, удзельнікі тэлеперадачы «Разумнікі і разумніцы».

— Вядома, было б зусім тужліва, калі б нас не падтрымлівалі людзі, якія любяць паэзію, сапраўдныя падзвіжнікі ў асветніцкай справе. Па ініцыятыве савета ветэранаў вайны, працы і ўзброеных сіл мы 2-3 разы ў тыдзень праводзім урокі жывой гісторыі ў школах Барысаўшчыны. І гэта гонар для нас, што нейкую частку асветніцкай, выхаваўчай работы з падрастаючым пакаленнем праводзяць нашы літаратары, — сказала В.Леві.

Далей яна распавяла пра літаб'яд­нанне «Натхненне», куды зараз увахо­дзіць каля 30 чалавек. У складзе гэтага вядомага ў рэгіёне калектыву ёсць і члены розных пісьменніцкіх саюзаў Беларусі, а таксама народнага клуба самадзейных кампазітараў і паэтаў «Жывіца» Мінскага аблцэнтра народнай творчасці. Некаторыя з іх маюць на сваім рахунку аўтарскія кніжкі, ін­шыя публікавалі творы ў калектыўных зборніках і перыядычных выданнях. Летась да 65-годдзя вызвалення Беларусі ад нямецка-фашысцкіх захопнікаў быў выдадзены калектыўны зборнік вершаў «Званы памяці», а зараз плануецца падрыхтаваць і выдаць кнігу сатыры і гумару «З усмешкай і ўсур'ёз».

Акрамя творчых шуканняў і шліфоўкі індывідуальнага майстэрства, члены літаб'яднання жывуць і грамадскім жыццём — прымаюць актыўны ўдзел у розных сустрэчах і ўроках на прадпрыемствах, у арганізацыях і школах, дзе чытаюць вершы, выконваюць песні.

Толькі за мінулы год такіх мерапры­ем­стваў было 59. Адзін з урокаў, які прайшоў у гімназіях №1 і №2, СШ №№ 2, 13, 20, 22, насіў назву «Паэты Барысаўшчыны пра вайну». Школьнікам расказвалі пра крывавыя жахі вайны, пра савецкіх байцоў, загінуўшых у агні бітваў, пра непахісную мужнасць нашага народа ў гады ліхалецця.

За гэта яны заслужылі прызнанне Барысаўскай раённай ветэранскай арганізацыі, ад імя якой да «натхнен­цаў» звярнулася член прэзі­дыума райсавета ветэранаў Ларыса Белая. Яна зачытала і ўручыла кіраўніку барысаў­скіх літаратараў Наталлі Гладышавай вітальны адрас, падпісаны старшынёй Барысаўскай раённай ветэранскай арганізацыі Зояй Маханёк.

Пасля афіцыйнай часткі публіка пачула тое, дзеля чаго і прыйшла на гэты паэтычны канцэрт. Чыталі вершы і спявалі песні члены літаб'яднання «Натхненне»: Валянціна Леві, Наталля Гладышава, Людміла Малчанская, Раіса Зарэмба, Раман Рубінчык, Лёля Багдановіч, Валянціна Анкудзінава, Уладзімір Голь­дзін, Раіса Гузеева, Міхась Разумейка, Алена Дзегцярова, Аляксандр Ляўша, Ганна Ветрава, Уладзімір Дзямідаў, Валянціна Чычылава, Вадзім Барысаў, Юргіта Пуза­най­тэ, Уладзімір Рудзік, Людміла Валасевіч, Генрыета Сяргеенкава, Міхась Градовіч, Соф'я Дзенісюк, Анатоль Мазгоў, Ала Лапошыч, Мікалай Фустачэнка. Выступу кожнага паэта папярэднічала невя­лікае чатырохрадкоўе, якое адлю­строўвае найболей характэрныя рысы таленту дадзенага аўтара.

Акрамя мясцовых літаратараў, свае таленты на сцэне дэманстравалі запрошаныя госці – актрыса і салістка ветэранскага хору Лідзія Аксенкруг і кампазітар і выканаўца Алег Жук (творчы псеўданім Радмір Веліч).

— Паэзія ніколі не памрэ, яна жыла, жыве і будзе жыць! Наступіць час, калі на выступленні паэтаў будуць збірацца цэлыя стадыёны, — выказала на­дзею Валянціна Леві, і зал удзячнымі апладысментамі падтрымаў яе думку. Ахвотнікі маглі набыць кнігу «Званы памяцi» з аўтографамі паэтаў, а таксама сфатаграфавацца з імі на памяць.

Анатоль МАЗГОЎ, фота аўтара